Obxectivos do programa
Aínda que o fin último que pretende todo programa de prevención é o de previr a aparición de problemas relacionados co consumo de drogas entre os destinatarios do mesmo, isto perséguese mediante a secuenciación doutros obxectivos que se estenden dende un ámbito máis xeral a outro máis concreto.
Obxectivos xerais
- Ofrecerlles aos mozos/as información veraz e detallada acerca da natureza, os efectos e mais os riscos que derivan do uso de drogas.
- Contrarrestar a influencia dalgúns factores que poden favorecer a aparición de problemas de consumo, tales como a falta de información, subxectividade da mesma, crenzas de autoprotección e resistencia ao dano, etc.
- Fortalecer nos alumnos/as algúns recursos persoais que lles permitan manexarse adecuadamente en situacións de grupo relacionadas co consumo de drogas.
- Promover o desenvolvemento de actitudes e valores favorecedores da saúde, a ocupación enriquecedora do tempo mediante ocio e deportes.
- En definitiva, atrasar ou impedir o inicio no consumo de drogas.
Obxectivos específicos
Modificar algúns dos factores de risco e potenciar aqueloutros facilitadores dunha maior protección, tales como:
- Coñecemento da interacción drogas-organismo, consecuencias do seu uso e riscos asociados.
- Tratar de favorecer o sentido crítico fronte á propaganda que potencia o consumo de substancias legais baixo argumentos de anticonvencionalismos e busca de sensacións.
- Potenciar a autoestima, a capacidade de decisión, a autonomía persoal e reforzar a asertividade como medios para potenciar a resistencia á pesión do grupo
- Mostrar alternativas de ocio e deporte facilitadoras de experiencias novidosas e excitantes para os/as adolescentes.
